Deskonfia Membru Polísia Organiza Joven ba Asalta Komunidade

Lafaek News– Deskonfia membru polísia hosi Unidade Polísia Marittima (UPM) no Ofisial Polísia Suku (OPS) organiza joven balun hosi Aldeia Vailovaia, Suku Com, Postu Administrative Lautein, Munisípiu Lautein ba asalta komunidade sira iha Aldeia Mukanchay.

fatuk ne’ebe toka kuak komunidade nia uma iha Aldeia Mukanchay.

Akontesimentu refere iha loron 2 Janeiru 2021, oras 7:22 kalan. Grupu organizadu mai halo asaltu ba rezidénsia vítima ho naran Rainero Fernandes Xavier, iha momentu vítima no família festeja hela hodi simu tinan foun.

Tuir fonte kredivel ne’e katak, bainhira sei hala’o ka selebra tinan foun hamutuk ho família derrepente de’it grupu ne’ebé deskonfia organiza hosi membru Polísia Nasionál Timor Lorosa’e (PNTL), mai asaltu hodi harahun komunidade nia uma no duni tuir nafatin vítima sira.

Nia informa, grupu organizadu ne’ebé mai halo asaltu ne’e la’ós ema seluk maibé sira mesak família de’it.

“Sira ne’ebé mai halo asalta ho nia maluk sira ne’e señór ida ho inisiál (AFX) nia alin rasik nia oan ho inisiál (AFX) mak mai lori kedas ho arma Branka hodi halo asaltu ba vítima ho inisiál (RFX) nia uma,” fonte kredivel ba Lafaek News iha Com Lospalos foin lalais ne’e.

Fonte ne’e hatutan, autór ho inisiál AFX mai hakilar no du’un katak parte vítima mak halo provokasaun maibé realidade iha terenu vítima no família festeja hela loron boot ka simu tinan foun, suspeitu sira mak mai halo asaltu.

momentu ne’e kedas família hosi vítima hatán kedas ba autór ho objetivu atu ha kalma situasaun maibé autór sira la simu hodi kontinua nafatin sira nia asaun.

Fonte ne’e argumenta, akontesimentu ne’e mós deskonfia involve hosi membru polísia na’in rua ne’ebé hodi halo asaltu ba komunidade sira.

Fonte ne’e dehan, polísia na’in rua ne’ebé deskonfia involve hotu iha kazu refere ida hosi Ofisial Polísia Suku hanesan mane foun ho inisiál MDS no ida seluk hosi Unidade Polísia Marittima ho inisiál OFX hanesan maun rasik hosi autor sira .

“Autór (membru polísia) na’in rua ladún professional ezerse sira nia misaun hodi dezarma arma branka maibé (husik liu de’it) hodi suspeitu sira kontinua duni tuir vítima sira,” fonte kredivel ne’e tenik

Ikus fonte kredivel ne’e dehan, la satisfás tebes ho hahalok hosi membru polísia na’in rua ne’e tanba la hatudu loloos sira nia kapasidade hodi servisu ou la hatudu profisionalizmu iha servisu, tanba ne’e husu ba parte komandu polísia munisípiu atu toma atensaun ba membru na’in rua refere.

Alende ne’e bainhira Lafaek News halo konfirmasaun ho OPS Suku Com kona-ba akontesimentu refere, nia rekoñese katak loos duni momentu ne’e iha duni fatin akontesimentu maibé la’ós hanesan ema ne’ebé atu suporta fali parte balun hanesan informasaun ne’ebé iha maibé halo duni atuasaun liuhosi husu apoiu ba komandu hodi mai halo kalma situasaun.

“Momentu ne’e ami alerta um (siaga satu) troka malu ha’u fila ba uma, kalan ne’e akontese duni nu’udar OPS halai ba iha ne’ebá, ha’u hamarik iha klaran, ha’u trauma duni sira iha ne’ebá ne’e grupu ho grupu maka hobur malu, ne’ebé ha’u sees tiha ha’u husu apoiu hosi polísia Marittima no eskuadra Lautein ninian. La’ós involve ba kazu ida ne’e, informasaun dehan ha’u involve ne’e laloos,” tenik nia

Dehan nia, karik informasaun ne’ebé hatete dehan involve hotu iha kazu ne’e hanesan instituisaun ida nia ema prontu nafatin bainhira komandu munisípiu bolu hodi ba halo investigasaun.

Entretantu iha akontesimentu refere rezulta uma rua hetan estragu tanba hetan tuda hosi autór sira no mós rezulta vítima Inacio kanek iha parte ulun.

 

Contributor : FDS

Editór           : Ezequias Tomás

1,061 Views

Fo opiniaun