Guilhermina : Tinan Ne’e, Dili Day La Realiza Atividade Bo’ot

Lafaek News—Prezidente Autoridade Munisípiu Dili Guilhermina Filomena Saldanha Ribeiro hateten, relasiona ho atividade Dili day nian, sira la konvida ema barak tanba sei iha hela estadu emerjénsia neduni sira la halo festeza ka atividade bo’ot.

“Ita  sei iha hela estadu emerjénsia entaun ami sei la konvida ema barak i ami seidauk halo atividade ne’ebé ke boot, se ita halo atividade boot ne’e halo kon ke ema mós sei mai barak, depois preokupa tebes ho regras husi ministériu saúde ho organizasaun saude mundiál nian katak tenke dook husi ema ida no ema ida, entaun ida ne’e ami evita,” dehan PAM Dili, Guilhermina Filomena Saldanha Ribeiro ba jornalista hafoin hala’o sorumutu ho PM Taur iha Rezidénsia PM Faról Dili, sesta (08/10/21).

Nia informa, komesa ohin ne’e orienta de’it katak postu administrativu ida organiza ninia ema ne’ebé mak iha hodi halo limpeza.

“Iha atividades ki’ik oan maibé ami hato’o ona proposta hein katak provasaun mak ami foin hala’o,” informa PAM Dili Guilhermina Saldanha.

Prezidente argumenta, tinan ne’e monu iha dia 10 laos de’it tenke halo iha 10 de outobru bele halo fila fali iha loron seluk.

“Maibé atu dehan festeza boot ka atividade boot ami la hanoin,” dehan Nia.

Nia informa, orsamentu 2022, Dili hetan milloens $7.684, enkuantu iha tinan ida ne’e Dili hetan milloens 8.667. Neduni programa prioridade ba tinan oin ninian, ida mak kona-ba estrada pontes, programa ida mak dezenvolvimentu rurál no urbanu, seguransa nasionál ninian asesu ba justisa, programa boa governasaun, agrikultura, bee no saneamentu, saúde, edukasaun no formasaun, igualdade jéneru no turizmu.

 

Jornalista : Juvita dos Santos

Asisten Editór : Pedro de Almeida

151 Views

Fo opiniaun