Hakarak Papa Mai TL Tenke Vasina

Lafaek News–Primeiru Ministru Taur Matan Ruak, afirma sarani Timor Leste hakarak Santu Padre Papa Francisco mai vizita, ema hotu-hotu tenke simu vasina astrazeneka.

Xefe governu ne’e enkoraza populasaun sira simu vasina nu’udar prekondisaun atu Santu Padre Papa Francisco vizita Timor-Leste iha nia viajen papal ba Ázia no Pasífiku iha inísiu tinan 2022  ne’ebé ajenadu ona hosi Vatikanu.

“Ita-boot sira rona, Reprezentante Papa nian iha ita-nia rain, ami na’in rua ko’alia nia dehan hanesan ne’e: Sr. Primeiru-Ministru ita boot bele hateten ba sidadaun sira tanba ha’u hatene Timor maioria Kátoliku, se hakarak Papa mai entaun tenke vasina,  tanba Papa kuandu mai vizita, ita tenke vasinadu hotu ona, seguru ona mak nia mai”, dehan, Primeru Ministru Taur iha fatin sosializasaun postu administrativu Letefoho, munisipiu Ermera, tersa (12/10/21) .

Primeiru Ministru Taur informa, foin da-daun reprezentante Vatikanu iha reuniaun ida ho Xefe Governu haktuir  inistaiva Papa Francisco nian atu vizita Timor-Leste, iha tinan oin, maibé Papa husu atu sarani Timor-oan sira tenke simu ona vasina, atu labele iha risku wainhira halibur malu lubun boot hodi simu Sua Santidade nia prezensa  iha Timor-Leste.

Molok termina sosializasaun iha Postu Letefoho, munisipiu Ermera, Xefe Governu ho komitiva kontinua ba aldeia Asoi-Lakau, Suku Dukurai. Hola parte iha  sosializasaun refere, Vise Ministru Saúde,  Bonaifacio Maucoli, Sekretáriu Estadu Kooperativa, reprezentante OMS iha Timor-Leste, DG Ministeriu Saúde, Odete Viegas,  no Autoridade Munisípiu Ermera no komunidade sira hotu.

Jornalista  : Juvita Dos Santos

Editór        : Agapito de Deus

95 Views

Fo opiniaun