KSTL Sujere Hasa’e Saláriu Minímu Ho $.200, Alarico : ”Sei Segredu Hela”

 News—Konfederasaun Sindikatu Timor-Leste (KSTL) husu governu atu aselera revizaun ba saláriu minímu $115, hasa’e ba $.200 hodi diginifika povu nia moris.

Prezidente KSTL Almerio Vila Nova, hatoo asuntu ne’e iha salaun SEFOPE kaikoli, segunda (11/10/2021), hafoin partisipa serimónia tomada de posse ba membru Konsellu Nasionál Traballu no Konsellu Nasionál Arbitrajen Traballu hamutuk nain ema nain 10, ne’ebé simu posse husi Ministru Koordenador Asuntu Ekonomia (MKAE) Joaquim Amaral.

“Ami bazeia ba peskiza KSTL 2014 iha ne’eba ami halo analiza ba kustu vida moris nian hatudu katak ita Timor Leste atu dignifika ema nia moris ne’e so ho montante $200.00, ne’e minimu ida ne’e maka bele diginika ema nia moris, se tun husi ida ne’e labele,” dehan Almerio Vila Nova

Lider KSTL ne’e sujere, governu iha obrigasaun atu aselera revizaun saláriu minímu ne’e hodi aprova iha konsellu ministru, razaun durante ne’e nota katak governu abandona nia responsabilidade atu fo moris diak ba ninia povu ida ne’e, nune’e nia sujere tenke hadia rendimentu diak hodi sustenta oan sira.

iha sorin seluk, Sekretaria Estadu Formasaun Professional no Empregu (SEFOPE), Alarico do Rosário, reforsa kna’ar ne’ebé simu nu’udar prezidente konsellu nasionál do traballu, sei servisu makaas hodi hare’e no kontinua progrsseu ne’ebé iha ona, no haree ba servisu futuru liu-liu kona-ba salariu minímu durante ne’e, tanba progresu husi saláriu minímu buat ida han tempu liu, tanba durante tempu naruk konsellu nasionál do traballu servisu hamutuk ho sekretariadu arbitragen halo estudu oin-oin hodi haree asuntu saláriu minímu.

“Ita tenke iha sentimentu ida ho vizuñus sira katak saláriu minímu iha padraun nasionál ne’e hira? Ita halo servisu tenke avansa ba oin desizaun sei iha leten, ne’e segredu nasaun nian labele públika bainhira seidauk hetan desizaun final husi konsellu ministru,” dehan SEFOPE Alarico

Nia hatutan durante konsellu nasionál do traballu hamutuk ho sekretariadu arbitrajen halo estudu komparativu ida katak ssaláriu minímu ne’e atu sa’e ba hira?, tan ne’e halo diálogu sosiál no diálogu ba sosiedade hotu atu haree salário minímu nune’e bele debate, maibé tuir lei katak tinan rua-rua halo revizaun, proposta hato’o ona ba konsellu ministru.

“Konsellu nasional traballu halo ida nee liu husi estudu analiza husi munisipiu ida ba munisipiu seluk hodi halo komparasaun sasan folin iha munisipiu ida hira, depois ita halo komparasaun hodi defini ba salariu minimu jia sae hira, tun hira nee segredu konsellu traballu nian maibe atu defini nee desijasaun konsellu ministru nia liman.

Hatan ba perokupasaun ne’e Ministru Koordenador Asuntu Ekonomia (MKAE) Joaquing Amaral, esplika, ekipa foun ne’ebé simu tomada de posse sei tau atensaun no buka dalan ho estratejia oin-oin sei fo solusaun apropriadu ba asuntu saláriu minímu.

“Saláriu minímu prosesu haree la’o hela, ha’u hanoin kestaun tempu de’it, ita tama iha ajenda ona ita sei too iha ninia solusaun sira ne’ebé inklui revizaun ba ssaláriu hirak ne’e, tanba ita ninia lejilasaun ne’e rasik, ita tenke hare’e sei too iha kestaun ssaláriu minímu nian, Ha’u hanoin mandatu ida ne’e kompremete atu rezolve, imi hatene prosesu ne’e la’os foin, maibé mai kedas husi anterior labele haluah ita sempre buka meius atu rezolve,” hatete Joaquim.

 

 

Jornalista : Pedro de Almeida/Tome Exposto

Editór        : Agapito de Deus

351 Views

Fo opiniaun