Munisipiu Bobonaro Ho Kreximentu Boot, Totál Ema 7.487 Simu Ona Vasina

Lafaek News–Governu liu husi Konsellu Ministru KM, ohin kuarta (13/10), halo aprezentasaun kona-ba rezultadu kampañia vasinasaun ne’ebé konta ho partisipasaun membru governu sira husi loron 30 setembru to’o loron 10 fulan outubru 2021.

Ministru Prezidénsia no Konsellu Ministru (MPKM), Fidelis Manuel Leite Magalhães hateten, durante periodu ne’e, membru governu sira ba iha munisipiu hotu hodi fahe informasaun kona-ba vasina kontra Covid-19 no sensibiliza populasaun ba nesesidade vasinasaun nian.

Ita rejista iha mundansa pozitivu balun, iha ne’e ita haree katak dezde hahú kampaña ho partisipasaun membru governu nian, administra ona totál vasina ho númeru 78.165, ne’e hanesan aumentu ida 17 pursentu husi persentajen vasinasaun iha nivél nasionál,” dehan MPKM Fidelis Magalhães hafoin remata enkontru KM iha Palasio Governu Dili, kuarta (13/10/21).

Governante ne’e relata, konta husi loron 30 fulan setembru to’o loron 10 fulan outubru, Bobonaro núdar munisipiu ho kreximentu boot liu, ho aumentu 303 pursentu, ho totál hamutuk ema nain 7.487 ne’ebé simu ona vasina iha periodu ida ne’e, liu tan 5.629 duké iha semana anteriór.

Ha’u espera katak rítmu ida ne’e bele kontinua no kontinua sa’e atu nune’e ita bele iha kobertura ne’ebé mak diak liu tan, generalizada ba iha populasaun iha munisipiu Bobonaro,” informa MPKM Fidelis.

Enkuantu iha munisipiu Baukau mós rejista kresimentu ne’ebé mak diak ho aumentu 122 pursentu, ne’ebé vasina tan ema hamutuk 5.286 duké iha semana anterior. Tuir fali munisipiu Ermera iha ona 97 pursentu komapara ho semana anterior husi inisiu kampaña vasinasaun ho membru governu sira, ne’ebé vasina tan ema hamutuk 3.885 duké iha periodu anteriór.

Entretantu membru governu sira mós halo avaliasaun kona-ba lalaok sira vasina nian no hato’o preokupasaun ne’ebé mak ministru sira hetan husi komunidade sira,  iha preokupasaun kona-ba  estrada, bee moos, kondisoens eskola sira no falta de asesu eletrisidade.

“Neduni informasaun ne’ebé ami rekolla ami fahe ba malu,” hakotu Nia.

 

Jornalista : Juvita dos Santos

 Editor        : Agapito de Deus

48 Views

Fo opiniaun