Presiza Kuda Ai-Horis Iha Dare Hodi Fornese Bee Ba Sidade Dili

Ekipa PERMATIL hamutuk ho komunidade sira kaer hela ai-oan iha liman hafoin lansa programa kuda ai-oan iha suku Dare. imajen Acacio Pinto.

Lafaek News—Diretór Ezekutivu Perma Kultural Timor Leste (PERMATIL), Ego Lemos, afirma nesesidade bee mos iha munisípiu Dili fornese husi suku Dare, presiza kuda ai-horis barak atu konserva bee iha rai okos.

Ego Lemos hatoo asuntu ne’e iha serimómia lansamentu dahuluk kuda ai-horis iha suku Dare atu sai suku floresta hodi aumenta bee iha rai okos nune’e labele afeta ba bee matan sira iha tempu bai loron naruk.

“Tanba Konservasaun bee no Rai ne’e importante la halimar Liu-liu suku Dare, baibain Ema bolu dehan suku floresta, no suku dare mak fornese bee ba Dili laran tomak,” Direktor ezekutivu permakultural, Ego Lemos afitma ba jornalista iha aldeia Coalau 1, Tersa (27/04/2021)

Ego dehan, ba da-daun iha suku Dare akaptasaun ba bee debu hamutuk 52 (lima bolu resin rua) ne’ebé atu akapta  bee bainhira udan ben ho velosidade makas hodi fo moris ba bee matan sira labele maran iha tempu bai loron.

Diretór ezekutivu PERMATIL, Ego Lemos, ne’e esplika tan ai-horis ne’ebé maka kuda iha suku dare hamutuk 5000 (rihun lima) no ai horis ne’ebé maka kuda iha suku Dare aldeia Koalau 1, ai mahoni ho ai kakeu, no ai kakeu rihun 3, no ai-mahoni rihun 2, maibé ai-kakeu diak kompara ho ai-mahoni.

“Ohin loron Ita lansamentu iha ne’e kuaze Ita kuda atus rua resin, no orsida komunidade sei kuda iha ida-idak Nia tos no liu-liu iha mota ninin sira,” hakotu

Observasaun Lafaek News iha serimónia kuda ai-oan ne’e partisipasa hosi komunidade hamutuk ema 43, kompostu Autoridade Lokal, Reprezentante Sekretario estaduJ uventude no Desportu SEJD , juventude  Aldea no ferik katuas sira, partisipa direta iha lansamentu konservasaun ba bee no Rai  iha aldeia Koalau suku Dare, Postu Vera Cruz Munisípiu Dili.

 

 

Jornalista           : Aniceto Dias

Editor                  : Agapito de Deus

704 Views

Fo opiniaun