Proklamasaun Independénsia Ba Dala-46 Ona, Hafalun Povu Iha Mukit no Susar Aihan

Inan faluk Maria Antonio tur hela iha nia barraka simples nia odamatan hafoin visita Jornalista Lafaek News, sábadu (27/11/2021). Imajen Pedro de Almeida.

Lafaek News—Timor Leste, selebra tan loron proklamasaun independensia ba dala 46, reflesaun iha dezenvolvimentu hatudu povu balun kiak too laiha aihan uma laran no kondisaun uma la dignu ba sira atu moris hanesan sidadaun Timor-oan iha nia rain rasik.

Realidade moris hanesan Inan faluk Maria Antonio idade 73, kondisaun difisiénsia matan no tilun, espresa sai husi nia fuan nakonu ho tristezas, tanba enfrenta hela moris ho kondisaun uma la seguru, laiha tan esperansa atu satan natureza nia siak, no mós nesesidade báziku liu-liu aihan uma laran hanesan foos hodi sustenta moris.

Los duni moris ne’e la’os fasil, iha balun ne’ebé riku la susar buat hotu, no balun kiak sempre hasoru problema oin-oin, helik an iha uma simples ida kalxu ho ai-rin iha uma lolon parte oin ho kotuk atu tuba laloran anin foho no udan boot nian.

Inan faluk Maria Antonio nia laen kaben fila ona ba mundu seluk la hamutuk ho nia iha tinan barak, nune’e laiha forsa atu buka moris, ho kondisaun uma ne’e presija tebes tulun atu hadia inklui nesesidade bázikas, da-daun ne’e foos hela de’it ona uituan la auguenta ona too semana ida.

Atividade kobertura ba asuntu sosiál iha terrenu haree hetan kondisaun uma inan faluk Maria Antonio hela ba ho medida 4×6 lokaliza iha aldeia Sukaer-laran beraka, orjinalidade husi aldeia moris foun, suku Hera, Postu-administrativu Kristu-Rei, Munisípiu Dili.

Uma ne’e rasik fahe ba kuartu rua, kuartu ida rai sasan hanesan armariu ida, ropa, rak bikan no nesesidade seluk inklui hatur kama hodi inan faluk deskansa ba hafutar ho ropa, iha kuartu seluk nu’udar sala vizita no tein hotu iha laran, rai mós bee, tasu no sana.

Moris kbiit lato’o atu solusiona problema ida ne’e pasensia hela de’it, hare’e ba rin uma nian malahok no kaduka de’it ho ai-rin husi liur, didin haleu ho kalen balun sadere hanehan ho ai ka la prega metin, husi parte uma laran didin ho piku komesa lahok no halis ba dadaun.

Iha uma laran fihir ba sorin-sorin borus to’o liur tanba kalen balun monu ona, hateke sa’e ba uma kakuluk ripas balun dodok no lahok ona no mós kalen kuak borus to’o lalehan susar tebes bainhira akontese udan no anin boot halo inan faluk Maria Antonio deskansa la hakmatek iha tempu kalan no mós loron.

Ha’u hela iha ne’e tinan lima liu ona, uma ne’e alin nia oan sira máka halo hela pois ha’u hela de’it, ha’u nia katuas oan mate kleur ona, fatin ha’u hela ba nemós ema nia rai de’it rai nain faan tiha ona ba ema seluk,” dehan avo Maria Antonio ba lafaek news iha nia rezidensia suaker laran Beraka, foin lalais ne’e.

La’os preokupa de’it ba kondisaun uma ne’ebé la favoravel, maibé iha mós problema seluk ne’ebé sempre hasoru loron-loron máka nesesidade báziku atu tahan estomuk mós garante de’it ba ema seluk, sorti di’ak hetan tulun husi familia sira no madre sira.

Foos hela uituan , ha’u atu sosa foos maibé lori saida máka atu sosa, osan laiha, ema máka fó foos uituan ba ha’u hodi han,” hateten ho mata wen.

Bainhira rona tiha problema hira ne’e, lafaek news koko dada lia mós ho vijinus, Rozita da Conceicão Soares, katak loos duni, Inan faluk Maria Antonio ne’e, hela kleur ona iha aldeia sukaer laran, kondisaun uma ladiak bainhira anin boot ne’e susar tebes, maibé konaba hahan loron-loron nia (Maria Antonio) lahusu ema atu ajuda, maibé so hein tulun husi nia oan sira no madre sira.

Ami máka haree lisuk avo ne’e, udan sei diak netik, tauk máka anin boot tanba ai-rin lahok hotu ona, didin mós lametin, mas hahan máka laiha  nia hakmatek iha uma de’it la husu ema ruma, hein de’it hetan tulun husi oan sira no madre hera, maibé ajuda dala ida ida,” hateten Rozita.

Jornalista : Pedro de Almeida

Editor        : Agapito de Deus

420 Views

Fo opiniaun